時下好多後生仔都機不離手， 變成「低頭族」，中聯辦主任張曉明就寄語年輕人「不僅僅在日常生活中用微博、微信或者WhatsApp 交流，而且要把目光投放在更廣闊的空間」，仲叫後生仔唔好只係上網搵食評或網購，應該做實事。學民思潮發言人黎汶洛（Oscar）就話，千祈唔好睇低後生仔用WhatsApp，皆因佢地都係用呢個社交媒體去做大事，動員市民去示威。

 

勿只上網搵食評要做實事

 

張曉明噚日出席博鰲亞洲青年論壇致辭時話，香港係一國兩制下有好多優勢，為後生仔提供廣闊天地同好多機會，所以希望佢唔單止淨係識玩WhatsApp、上網購物同睇食評，亦好應該做創新夢想家同實幹家。

 

Emily 去問Oscar 點睇張主任一番話，Oscar 話後生仔真係成日玩WhatsApp，因為社會資訊太多，要與時並進。Oscar 仲笑住咁講， 「唔通佢（張曉明）係暗示緊擔心年輕人知咁多資訊，會不利中央政府？」Oscar 話其實?家好多後生仔目光都好遠，但基於政治現實，好多實現唔到。

 

籲做創新夢想家同實幹家

 

張曉明語重心長，原因係睇到香港全球競爭力報告，香港雖然升兩級排名第7，但係創新方面排名得23，而目前「形勢逼人，不進則退」。佢呼籲特區政府、企業家同社會各界都應該重視對創新力投入。

 

署理行政長官林鄭月娥就話，政府非常短期內會成立一個5 億元「社會創新及創業發展基金」，畀有志於用創新意念幫助其他人機構或個別人士申請，當然歡迎後生仔申請啦。